*Vistara crisis: ટાટા ગ્રૂપની વિસ્તારા એરલાઇનનું સંકટ વધી રહ્યું છે. પાઇલટ્સની અછતને કારણે આ એરલાઇન્સે તેની ફ્લાઇટ્સ અસ્થાયી ધોરણે ઘટાડી દીધી છે. છેલ્લા કેટલાક દિવસોમાં વિસ્તારા એરલાઈને 70થી વધુ ફ્લાઈટ્સ કેન્સલ કરી છે.*
ટાટા ગ્રૂપની વિસ્તારા એરલાઇનનું સંકટ વધી રહ્યું છે. પાઇલટ્સની અછતને કારણે આ એરલાઇન્સે તેની ફ્લાઇટ્સ અસ્થાયી ધોરણે ઘટાડી દીધી છે. છેલ્લા કેટલાક દિવસોમાં વિસ્તારા એરલાઈને 70થી વધુ ફ્લાઈટ્સ કેન્સલ કરી છે. હવે નાગરિક ઉડ્ડયન મંત્રાલયે આ બાબતે વિગતવાર રિપોર્ટ માંગ્યો છે.
શું છે મામલો?
વિસ્તારા એરલાઇનના ઘણા કર્મચારીઓ અને અધિકારીઓ પગાર સુધારણાના વિરોધમાં તબીબી રજા પર ગયા છે, જેના કારણે એરલાઇનને ફ્લાઇટ્સ રદ કરવી પડી હતી. ઘણી ફ્લાઈટ સેવાઓ પણ મોડી પડી રહી છે. ફ્લાઇટ કેન્સલ થવાની સંખ્યા સતત વધી રહી છે. દરમિયાન એરલાઈને વિક્ષેપ માટે મુસાફરોની માફી માંગી છે.
કંપનીએ શું કહ્યું?
વિસ્તારાના પ્રવક્તાએ જણાવ્યું હતું કે, છેલ્લા કેટલાક દિવસોમાં, ક્રૂની અછત સહિતના વિવિધ કારણોસર એરલાઇનને મોટી સંખ્યામાં ફ્લાઇટ્સ રદ કરવી પડી હતી અને ઘણા કિસ્સાઓમાં વિલંબ થયો હતો. પ્રવક્તાએ કહ્યું- અમારા નેટવર્કમાં પર્યાપ્ત કનેક્ટિવિટી સુનિશ્ચિત કરવા માટે અમે અમારી ફ્લાઈટ્સની સંખ્યા અસ્થાયી ધોરણે ઘટાડવાનો નિર્ણય લીધો છે. પ્રવક્તાએ એમ પણ કહ્યું કે, પરિસ્થિતિને સામાન્ય બનાવવાના પ્રયાસો કરવામાં આવી રહ્યા છે અને નિયમિત કામગીરી ટૂંક સમયમાં ફરી શરૂ થશે.
શું સમસ્યા છે?
સૂત્રોએ જણાવ્યું હતું કે વિસ્તારા નવા કોન્ટ્રાક્ટ હેઠળ તેના A320 ફ્લીટના પ્રથમ અધિકારીઓના માસિક પગારમાં સુધારાને પગલે પાઇલટ્સની અછતનો સામનો કરી રહી છે. સૂત્રોએ જણાવ્યું હતું કે, બીમાર હોવાની જાણ કરનારા અધિકારીઓએ એરલાઇનને ફ્લાઇટ્સ રદ કરવાની ફરજ પાડી હતી કારણ કે તેમના પગારમાં ઘટાડો કરવામાં આવ્યો હતો. તેમણે દાવો કર્યો હતો કે પગારના કેટલાક ઘટકોમાં ઘટાડો કરવામાં આવ્યો છે, જ્યારે ફ્લાઈંગ અવર્સ સાથે જોડાયેલા પ્રોત્સાહનોમાં વધારો કરવામાં આવ્યો છે.
એર ઈન્ડિયા અને વિસ્તારાનું મર્જર
તાજેતરમાં એર ઈન્ડિયા-વિસ્તારાના મર્જરને સિંગાપોરના રેગ્યુલેટરની મંજૂરી મળી ગઈ છે. આ સાથે જ બંને એવિએશન કંપનીઓના મર્જરનો રસ્તો સાફ થઈ ગયો છે. તમને જણાવી દઈએ કે વિસ્તારાના એર ઈન્ડિયા સાથે મર્જરની જાહેરાત નવેમ્બર 2022માં કરવામાં આવી હતી. આ અંતર્ગત સિંગાપોર એરલાઈન્સને એર ઈન્ડિયામાં 25.1 ટકા હિસ્સો મળશે. વિસ્તારા એ સિંગાપોર એરલાઈન્સ અને ટાટા ગ્રુપ વચ્ચેનું સંયુક્ત સાહસ છે.
